Fecha: 04/12/2009 a les 11:00:00

El conseyeru de Mediu Ambiente, Ordenación del Territoriu y Infraestructures, Francisco González Buendía, faló del proyectu d'instalar un parque eólicu n'A Serra de Carondio (Ayande) nuna comparencia na Xunta Xeneral, na qu'aseguró que se punxeron «tou tipu de condiciones pa preservar el patrimoniu cultural asturianu y evitar dañu nesa contorna que ye necesario preservar».

El titular de Mediu Ambiente afirmó que la Comisión d'Urbanismu d'Asturies yá impunxo nel so día les condiciones del proyectu y apuntó que la Conseyería de Cultura taba informada d'esti asuntu que, esplicó Buendía, «tuvo una tramitación llarga y, depués de toles tramitaciones y de respetar toles condiciones que s'impunxeron en Cultura sobre afecciones al patrimoniu etnográficu y sobre l'accesibilidá pa evitar daños a esi patrimoniu, la CUOTA impunxo unes condiciones severes, dures, pa preservar el patrimoniu cultural asturianu, de gran valor nesa zona».

Nesti sen, el conseyeru de Mediu Ambiente concluyó que «desque l'actuación tien tolos permisos y informes preceptivos de competencia autonómica, y que'l Plan Especial foi informáu favorablemente, l'aprobación definitiva pasó al Conceyu d'Ayande, que ye a quien-y correspuenden les demás autorizaciones».

Fuente: Les Noticies