Fecha: 10/12/2009 a les 14:18:00

La Coordinadora Ecoloxista d'Asturies denunció énte'l Seprona, la Conseyería de Cultura y el Conceyu d'Ayande «los daños importantes» fechos al patrimoniu históricu por cuenta de les obres d'accesu pa la construcción del parque eólicu de Carondio.

Según esti colectivu, les obres estrozaron enforma la Carreiriega de los Gallegos, camín históricu que comunica los valles del Navia y del Narcea. Esti camín debió valir na dómina romana pa tresportar l'oru de les mines de Bustantigo a Grandas de Salime. Tovía va poco catalogóse na zona, en Moyapán, un campamentu romanu. La Carreiriega ye un bien protexíu d'alcuerdu col artículu 61 de bienes protexíos pola Llei 1/2001, de 6 de marzu, de Patrimoniu Cultural del Principáu d'Asturies.

Nesi sentíu, la Coordinadora Ecoloxista esplica que la Conseyería de Cultura impunxera na Declaración d'Impactu Ambiental del 27 de febreru del 2001 que les obres nun podíen facese a menos de 25 metros de la Carreiriega «cosa que se vien incumpliendo reiteradamente pola empresa y que pudimos comprobar», denuncien los ecoloxistes, qu'amás faciliten semeyes de la estroza.

Por eso, esti colectivu espera que'l Gobiernu asturianu «paralice, ensin demora» les obres que ta faciendo la maquinaria pesada nos accesos al parque «con una clara afección al patrimoniu, con una llicencia municipal irregular, nun sitiu d'altu valor natural que diba quedar afectáu si se lleva alantre'l parque eólicu».

Fuente: Les Noticies