Fecha: 01/12/2009 a les 20:00:00

La Coordinadora Ecoloxista d’Asturies demandó al Conceyu d’Ayande que pare «inmediatamente» les obres d’accesu que se tán faciendo pal parque eólicu de Carondio, al nun tener l’informe preceptivu de la CUOTA. «El conceyu facilitó la llicencia ensin tener l’informe obligatoriu de la CUOTA cuando se trata de terrenos non urbanizables, como ye’l casu», afirma’l colectivu ecoloxista.

Al tiempu, la Coordinadora recuerda que nel occidente del país ta previsto instalar ochenta parques eólicos, lo que supón llantar 1.400 molinos con una potencia total de 1.600 megawatios. Nel casu de Carondio, la previsión ye poner 25 molinos «nun paraxe d’altu valor natural onde ta’l mayor conxuntu tumular d’Asturies y onde tán catalogaos 34 túmulos, lo que representa un conxuntu inigualable».

Igualmente, el colectivu señala qu'esi conxuntu ta dientro del paisaxe protexíu d'A Serra de Carondio «onde se conserven bien de vestixos de les cultures primitives d'antiguos pobladores y la práctica totalidá d'esi territoriu ta estráu de túmulos funerarios». Amás, señálase que depués de que se diera l'autorización ambiental al proyectu «descubrióse un campamentu romanu que tamién se diba ver afectáu».

Tocante a que se trate d'un paisaxe protexíu, la Coordinadora Ecoloxista apunta que ye habitual que nestes zones haya presencia d'especies tan significatives como l'osu, el faisán, l'águila real, l'azor, el ferre, la mostandiella o'l gatu algaire.

Tou esti espaciu, col so patrimoniu arqueolóxicu, remarca'l colectivu ecoloxista, «ta protexíu pola Llei de Patrimoniu Cultural», polo que ta enfotáu en que'l Conceyu d'Ayande «paralice ensin más tardar les obres que ta faciendo la maquinaria pesada nos accesos al parque, porque si non díbemos presentar denuncies contra'l Consistoriu por daños al patrimoniu».


Fuente: Les Noticies.