La Coordinadora Ecoloxista quéxase de la «falta de rigor» de Cultura en Carondio
Posted by Pico Carondio on Thursday, January 14, 2010
Under: Obra illegal
Fecha: 14/01/2010 a las 14:19:59
La Coordinadora Ecoloxista d’Asturies acaba de treslladar a la Conseyeria de Cultura la quexa pola falta de rigor de la so resolución sobre la denuncia que l’asociación fixera’l 4 d’avientu pasáu comunicando los daños al patrimoniu históricu n’A Serra de Carondio. Los estrozos causólos la maquinaria que ta abriendo pistes pa la construcción del parque eólicu que se ta executando nesi cordal ente los conceyos d’Ayande y Eilao, y que cuenta con ún de los mayores conxuntos tumulares d’Asturies (34 túmulos).
La Conseyería de Cultura reconoz que la empresa nun marcó les estructures qu’había que protexer y recláma-y qu’entaíne a balizales tal y como-y lo esixera na so resolución de 4 de payares del añu pasáu. En cuantes a los daños al patrimoniu que denunciara la Coordinadora Ecoloxista –concretamente, al camín prehistóricu conocíu como La Carreiriega de los Gallegos–, reconoz que los hubo, pero señala que taben autorizaos nuna resolución de la Comisión Permanente de Patrimoniu del 9 de setiembre del añu pasáu.
La Coordinadora diz que ta «sorprendida» de que s’autorice la destrucción del patrimoniu cuando La Carreiriega ye un bien protexíu d’alcuerdu col artículu 61 de bienes protexíos pola Llei 1/2001, de 6 de marzu, de Patrimoniu Cultural del Principáu d’Asturies, al facese escavaciones sobre la zona. Destácase tamién nel comunicáu l’aparición en plenu parque eólicu de los restos d’un campamentu romanu. La entidá señala como responsables de la estroza tanto a la empresa de les obres como a les dos alministraciones, que permitieron un dañu «que yá alvirtiéremos como posible nun paraxe escepcional tanto al Principáu como al Conceyu». La Coordinadora Ecoloxista llamenta «el papel del Principáu, que permite la destrucción del nuestru patrimoniu arqueolóxicu nun entornu de munchu valor natural que quedaría afectáu si se fai’l parque eólicu previstu, pal beneficiu esclusivu d’una empresa eléctrica nesti vendaval eólicu que recuerre l’Occidente asturianu».
Fuente: Les Noticies
La Coordinadora Ecoloxista d’Asturies acaba de treslladar a la Conseyeria de Cultura la quexa pola falta de rigor de la so resolución sobre la denuncia que l’asociación fixera’l 4 d’avientu pasáu comunicando los daños al patrimoniu históricu n’A Serra de Carondio. Los estrozos causólos la maquinaria que ta abriendo pistes pa la construcción del parque eólicu que se ta executando nesi cordal ente los conceyos d’Ayande y Eilao, y que cuenta con ún de los mayores conxuntos tumulares d’Asturies (34 túmulos).
La Conseyería de Cultura reconoz que la empresa nun marcó les estructures qu’había que protexer y recláma-y qu’entaíne a balizales tal y como-y lo esixera na so resolución de 4 de payares del añu pasáu. En cuantes a los daños al patrimoniu que denunciara la Coordinadora Ecoloxista –concretamente, al camín prehistóricu conocíu como La Carreiriega de los Gallegos–, reconoz que los hubo, pero señala que taben autorizaos nuna resolución de la Comisión Permanente de Patrimoniu del 9 de setiembre del añu pasáu.
La Coordinadora diz que ta «sorprendida» de que s’autorice la destrucción del patrimoniu cuando La Carreiriega ye un bien protexíu d’alcuerdu col artículu 61 de bienes protexíos pola Llei 1/2001, de 6 de marzu, de Patrimoniu Cultural del Principáu d’Asturies, al facese escavaciones sobre la zona. Destácase tamién nel comunicáu l’aparición en plenu parque eólicu de los restos d’un campamentu romanu. La entidá señala como responsables de la estroza tanto a la empresa de les obres como a les dos alministraciones, que permitieron un dañu «que yá alvirtiéremos como posible nun paraxe escepcional tanto al Principáu como al Conceyu». La Coordinadora Ecoloxista llamenta «el papel del Principáu, que permite la destrucción del nuestru patrimoniu arqueolóxicu nun entornu de munchu valor natural que quedaría afectáu si se fai’l parque eólicu previstu, pal beneficiu esclusivu d’una empresa eléctrica nesti vendaval eólicu que recuerre l’Occidente asturianu».
Fuente: Les Noticies
In : Obra illegal