La Coordinadora Ecoloxista d’Asturies denuncia la vulneración de los
derechos "d'Accesu a la Información que tenemos per parte de la
Conseyería de Cultura, que ta denegándonos l'accesu al espediente del
parque eólicu previstu en Carondio dende hai 2 meses". El proyectu
eólicu de la Sierra de Carondio ta arrodiáu de polémica al ser una zona
que nel PORNA ta catalogada como "Paisaxe Protexíu", y abelluga amás ún
de los conxuntos tumulares más importantes del nuesu país.
Según denuncien los ecoloxistes "Cultura lleva dos meses dándonos
vueltes pa nun dexanos ver l'espediente, vulnerando el marcu llegal
recoyíu na Llei 27/2006 que regula los derechos d'accesu a la
información, participación pública y accesu a la xusticia en materia de
mediu ambiente, que prevé un derechu d'accesu a la información
ambiental a favor de 'toos', incluyendo persones físiques y
xurídiques". Derechu que, señalen, "se puede exercer ensin que pa ello
ten obligaos a declarar un interés determináu". Asimesmo
l'alministración tien de contestar la solicitú nel "plazu d'un mes".
Nesti casu, segun la CEA, l'alministración asturiana tardó más d'un mes
"sólo en contestar pa desixir prueba de la representación y interés nel
espediente, plazu realmente inxustificable".
Dende la Coordinadora Ecoloxista d’Asturies recuerden que la zona
"onde se pretende asitiar esti parque eólicu con 25 molinos ye d'altu
valor históricu y patrimonial, col mayor conxuntu tumular d'Asturies,
que se vería fuertemente dañáu". Conseñen asimesmo qu'hai catalogaos 34
túmulos na zona, lo que representa "un conxuntu inigualable", y que
"con posterioridá a l'autorización ambiental descubrióse un campamentu
romanu que tamién veríase afectáu".
A la oposición de los ecoloxistes a esti proyectu súmase la dellos
ciudadanos agrupaos nel "Colectivu Ciudadanu pola Conservación de
Carondio", qu'al traviés
de la so web tan faciendo un siguimientu críticu del proyectu de parque eólicu en Carondio
Fuente:
Asturies.com
Por un futuru sin más estropicios no mediu natural.
