Carondio

Unidá Nacionalista Asturiana pide que se depuren toles responsabilidaes a nivel alministrativu y xudicial nel gobiernu asturianu nel casu del vertíu d’escombros d’una pista forestal autorizada pola Dirección Xeneral de Política Forestal, nel entornu protexíu d’A Serra de Carondio.

Énte esta nueva agresión al mediu ambiente n’Asturies y énte la pasividá del gobiernu asturianu y en concretu del Director Xeneral de Política Forestal, Joaquín Arce, UNA pide l’aclaración de los fechos de manera inmediata y si se prueba que la información amentada taba en conocencia del señor Arce dende hai meses, la dimisión darréu del mesmu por incumplir les funciones de control remanecíes de les sos responsabilidaes, col agravante de ser un representante de Los Verdes d’Asturies, a los que se-yos ha suponer una sensibilidá especial nestos temes, inda qu’evidentemente sensibilidá tala nun s’aprecia gota na xestión del señor Arce de magar accedió a la Dirección de Política Forestal.

L’agrupación nacionalista quier manifestar el so desalcuerdu total coles polítiques medioambientales del gobiernu asturianu, y nesti casu cola omisión de la so función de control de les obres nun entornu protexíu y de gran valir etnográficu y ecolóxicu como ye A Serra de Carondio.

Fuente: Aruela.com