Carondio

Fruti Pontigo, portavoz de la Coordinadora Ecoloxista d'Asturies asegura que la Conseyería de Cultura «ta negándonos l'accesu al espediente del parque eólicu previsto p'A Serra de Carondio dende hai dos meses».

Según el portavoz ecoloxista, «Cultura lleva dos meses dándonos vueltes pa nun dexanos ver esi documentu, polo que ta vulnerando'l marcu llegal recoyíu na Llei 27/2006, de 18 de xunetu», llei que regula los derechos d'accesu a la información, participación pública y accesu a la xusticia en materia de mediu ambiente y, que nel so artículu 3, prevé un derechu d'accesu a la información ambiental «a favor de toos», incluyendo persones físiques y xurídiques. «Nesi casu, esta Alministración retrasóse yá un mes, namás en contestar, pa esixir prueba de la representación nel espediente, plazu que ye de toles maneres inxustificables», denunció Pontigo.

El portavoz d'esti colectivu aseguró qu'«existe xurisprudencia abondo sobre la llexitimación de les asociaciones ecoloxistes pa intervenir ente l'Alministración y pa exercitar l'acción pública en materia medioambiental». Según él, esti colectivu «vien interviniendo en numberosos espedientes de la Alministración, que normalmente nos remite información sobre tolos espedientes rellacionaos col medioambiente, polo que resulta raro qu'agora soliciten acreitación de la capacidá d'obrar». Amás, Pontigo tamién criticó que «tamién sorpriende que se pida acreitación de representación del colectivu, cuando l'Alministración me vien reconociendo davezu».

Por too esto, el portavoz de la Coordinadora Ecoloxista d'Asturies espera que «ensin más dilación la Conseyería de Cultura nos permita acceder al espediente, porque la execución del proyectu del parque eólicu causaría perxuicios d'imposible o difícil reparación nos xacimientos tumulares y nos caminos históricos de la zona».

Mentanto, la plataforma SOS Carondio anima a la xente interesao en conocer cuála ye la zona afectada y qué impactu pue tener la instalación enerxética prevista a participar nuna visita a A Serra de Carondio. Les persones interesaes n'asistir pueden ponese en contactu col organizador, Emilio Rabanal, nel teléfonu 649 679 915 y nel corréu milioram@yahoo.es. De mano, cuéntase con contratar un autobús que salga'l domingu a les 9 hores del Edificiu Alministrativu de Servicios Múltipes d'Uviéu, na cai Coronel Aranda.