El propósitu d'esta páxina yía consiguir el tou apoyu pa la protección d'una agrupación de 34 túmulos que tán al pía de Pico Carondio (1.221m). El gobiernu autonómicu asturianu quier tramitar rápidamente la instalación d'un parque eólicu nesti espaciu, probe ya pouco pobláu. Tamos a favor de las enerxías renovables, pero non a esti preciu.
Cumo sabrás, los parques
eólicos necesitan vías d'accesu, amás de linias de tensión alta
que destrúin el paisaxe. Muitos de nosoutros tenemos la suerte de poder
visitar dólmenes cumo “A Llastra da Filadoira” (ver foto abaxu) al pía
de Pico Carondio.
Parques eólicos ya la recesión económica:
En setiembre de 2009
el gobiernu autonómicu asturianu aprobóu un macro-plan pa la instalación
de 40 parques eólicos nuevos n'Asturias, todos el.los na parte occidental
del país. D'unas décadas p'acó, l'occidente asturianu vien sufriendo
un éxodu rural p'hacia las ciudades. La naturaleza eiquí recuerda
a paisaxes cámbricos, con una riqueza inmensa en megalitos, castros
de la Edá del Fierro, marcas nas penas, minas d'oro d'época romana
ya un campamentu militar romanu.
El conxuntu arqueolóxicu
de Carondio inclúi dólmenes qu'utiliza'l Conceyu de reclamu turísticu
(
http://www.allande.org/
La razón pol cambiu actual yía la gravedá de la recesión económica n'España. Ya los que pagan la factura, n'Asturias, van ser precisamente los conceyos del occidente cola renta per cápita más baxa.
El proxectu del parque
ta encabezáu por HC Energía, una empresa d'electricidá con
see en Lisboa. La infraestructura constaría de 25 aeroxeneradores (molinos)
con un altor de 60m. El problema que tien la empresa (ya l'alministración)
yía cumo van mantener las distancias de seguridá a los monumentos
prehistóricos. Nós creemos que nun se puede l.levantar un parque eólicu
nuna zona arqueolóxica. Los trabayadores de las palas nun tán preparaos
pa distinguir ente un megalitu ya un montón de piedras.
Pico Carondio
A lo l.largo de 10Km, al pía de Pico Carondio, pasa un camín prehistóricu conecíu cumo “La Carreiriega de los Gallegos”. La Carta Arqueolóxica d'Ayande recói 34 túmulos nesta zona. La mayoría tán a la vera d'esti camín que servía pa comunicar las concas d'El Ríu Grande ou Navia ya'l Ríu Narcea. Dalgunos xacimientos tán bien conservaos ya d'outros quedan unas piedras afitadas.
Pesie a que'l gobiernu autonómicu ya'l del Conceyu se refieran a Carondio cumo un “paisaxe protexíu”, esto nun tien nengún valor legal. Creemos que foi la fórmula del gobiernu autonómicu p'atraer turismu pal Conceyu na década de los 90. L'alministarción n'Uvieo aprueba agora la instalación de más parques eólicos cola excusa de que los conceyos cumo Ayande s'auto-financien. Esqueicense de que los turistas nun vienen pa la nuesa tierra a mirar paisaxes astraos de los modelos más nuevos de turbinas de Gamesa.
Por esta razón, la Coordinadora
Ecoloxista d'Asturies (CEA) vien d'apresentar un recursu alministrativu
n'Uvieo contra'l proxectu del parque eólicu de Carondio, al que nos
axuntamos. Creemos qu'una política encaminada a conservar el nuesu
padremuñu ya'l desenvolvimientu sostenible yía la fórmula más acertada
pal occidente d'Asturias, ya non la venta al por mayor de los nuesos
recursos a empresas enerxéticas.
Tamién tenemos abierta una cuenta en CajAstur pa cubrir los gastos del abogáu. Los códigos IBAN ya Swift son los que siguen:
IBAN: ES5520480074173400016282
SWIFT code: CECAESMM048
Seiría un honor pa nós contar col tou apoyu pa Carondio.
Muitas gracias.
*
|
Mt. Carondio_Les_Noticies_AST.pdf Size : 3.246 Kb Type : pdf |
